【Grandsky Professional @ 2017日本FEELING交流團】

【Grandsky Professional @ 2017日本FEELING交流團】

Grandsky Professional 一班專業髮型師、髮型導師與及工作人員一行20多人，喺6月21日正式踏上 <2017日本FEELING交流團>之旅。

此行目的係到日本FEELING接受課程培訓，瞭解最新嘅髮型潮流同技術，同時學習日本嘅經營方式，運用系統管理掌握客戶回頭率，及按不同時間為客戶訂製一系列髮式，從而提升客戶嘅消費意欲及行業本身嘅經濟效益。

一行人在當地食府享用豐盛的晚餐

今次課程主講導師係日本著名嘅髮型大師大竹祐紀先生，佢除咗擔任Minx原宿店店長，仲係網絡人氣No.1紅人，對美髮知識同技術擁有獨特嘅見解。

整個課程主要分為幾個部分，大竹先生首先同我哋分享咗各種經營心得，以及喺面對客人時如何應對同溝通。另一部分係即場示範各種潮流染髮、剪髮同造型技巧。

此外，大竹先生仲同大家一齊探討整體形像嘅溝通同學習正統日本FEELING文化。

由於課程時間緊湊，一班HKDI導師積極爭取課後時間與大竹老師研究染髮技術，包括潮流新興嘅裙擺染髮，希望將更多新技術引進到未來兩年嘅HKDI課程內，相信到時裙擺染髮技術喺香港必定會大放異彩呀！

一行人仲去到Minx原宿店參觀，呢間髮廊喺當地赫赫有名，係唔少潮人、明星幫襯嘅星級之選。俗語有話「知己知彼 百戰百勝」，交流團一班髮型師都落足心機去參觀，希望能瞭解到成功營運髮廊嘅秘訣。最大得著係大家都見識咗日本髮廊對服務質素嘅追求、每個微細步驟嘅執著以至整體造型嘅堅持，呢啲都係值得我哋去學習嘅地方。

Minx原宿店裝潢簡約而優雅

所謂work hard play hard，呢次出Trip當然唔少得吃喝玩樂啦！大夥兒喺築地市場覓食之餘，仲去到澀谷區、原宿、表參道、秋葉原、銀座等地血拼，個個都滿載而歸呀！

總結今次嘅日本FEELING交流團，一班髮型師除咗見識到日本嘅髮型文化以及技術，同時仲可以趁機互相交流，大家暢所欲言，由生活點滴、髮廊業務以至行業發展等等無所不談。展望未來會有更多交流機會，促進香港嘅髮型業有更大嘅發展空間。

#日本FEELING

#GrandskyProfessional

#MakeOurHairDREAMComeTrue